miembresia KEP

Miembresia

Miembresia di un Credit Union ta konsistί di miembronan ku ta kompartί un base komun i ku a djὸin den un struktura di un kooperativa pa konhuntamente logra benefisionan finansiero.

Kiko ta un Credit Union?

Un Credit Union ta un organisashon ku tin un struktura di un kooperativa. Meta prinsipal ta pa promové sparmentu, brinda otro e oportunidat pa hasi fiansa ku kondishonnan fleksibel i invertí den e kooperativa. Miembronan, kendenan alabes ta doño di e kooperativa, ta kontrolá e Credit Union demokrátikamente.

Pa kiko KEP ta para?

Credit Union KEP ta brinda servisio profeshonal, kumbiniente, konfiabel i personal basá riba e nesesidatnan spesífiko di su miembronan. Ta aloká rekursonan finansiero i humano na e manera mas efisiente pa asina garantisá ku nos organisashon ta keda unu stabil, salú, seif i sólido ku kontinuamente ta desaroyá i ta sigui mehorá.

Den nos afan pa kumpli ku nesesidat di nos miembronan KEP ta boga pa, mediante mehorashon kontinuo, keda un paso dilanti pa loke ta trata desaroyonan den sektor finansiero i di nos kompetidornan. Ademas nos ta pone énfasis riba aspektonan edukativo ku ta stimulá i eduká nos miembronan.

Kon Kooperativa KEP ta funshoná?

Afiliando na KEP kompanianan ta duna nan empleadonan un alternativa sano, ku no ta basá riba ganashi manera otro institutonan finansiero ku si ta buska pa maksimalisá nan ganashi.

Di e manera aki nos ta kapas di ofresé interes mas abou pa fiansa, interes mas haltu pa spar i gastunan redusí pa nos servisionan. Miembronan mes ta akshonista den kooperativa KEP. Na fin di aña ora KEP sera su buki i hasi reservanan , KEP ta repartí e surplus na fondo bou di su miembronan komo dividendo.
Komo ku nos ta bou di supervishon di Banko Sentral, miembronan por ta sigurá di e kontinuidat i solvabilidat di KEP. Nos ta un kooperativa sólido i konfiabel pa invertí bo sèn den dje. Komo miembro bo ta doño, no djis un kliente. Solamente miembronan por hasi uso di nos servisionan. Maneho di KEP ta tuma lugá demokrátikamente; kada miembro tin un voto, no opstante e kantidat di akshon ku e la akumulá.

Benefisionan di miembresia

Tempunan ekonómiko difísil ta pidi formanan kreativo pa akomodá e nesesidatnan variá di empleadonan. KEP ta ofresé un forma pa duna mas, sin gasta mas. Ora bo djòin KEP, bo por disfruta di e siguente benefisionan:

  • Interes mas abou riba fiansa
  • Interes mas haltu riba sèn di spar
  • Mihó resultado di bo invershon kompará ku otro institutonan finansiero lokal.
  • Un kombinashon úniko i atraktivo di produkto i servisio.
  • Ningun gastu atministrativo.
  • Kontesta rápido riba petishon di fiansa.
  • Pago di dividendo riba surplus.
  • Un forsa di kompra kolektivo fuerte ku ta duna mihó dil i balor agregá.

Benefisionan pa kompania

  • Indirektamente bo empleadonan lo tin un pakete mas atraktivo di benefisionan sekundario.
  • Empleadonan lo no pidi bo fiansa mas; nan ta preferá hasi nan fiansa na KEP.
  • Aspektonan edukativo ku KEP ta ofresé lo yuda empleadonan desaroyá.

Kon afiliá?

Afiliá ta grátis, unabes bo a konsiderá e benefisionan di bira miembro di KEP, bo ta kla pa komprometé. Kompanianan ta afiliá grátis.

E úniko kondishon pa kompanianan ku ke djòin ta pa dedusί pagonan hasί na KEP for di salario di empleadonan i transferí esaki pa KEP. Miembronan si mester paga un montante chikí di 25 florin pa afiliá.

Unabes afiliá, miembronan ta kumpra nan akshon pagando un montante mensual. Di e forma aki nan ta akumulá akshon. Pues for di promé dia bo ta kuminsá forma bo portafolio kumprando akshon tur luna. Tur empleado por mira nan portafolio krese tur luna riba nan 'statement' personal. Miembresia ta duna derechi inmediato pa hasi uso di tur servisio di KEP. For di momento ku bo tin 3 luna afiliá na Kep bo ta bini na remarke pa hasi fiansa.

Pa afiliá ta fásil. Click riba e link aki i yena e formulario pa bo sign up online. Tambe bo por pasa libremente na ofisina di KEP.

Afiliá Grátis

Kiko ta Akshon?

Birando miembro di KEP bo ta invertí den e kooperativa kumprando akshon mensualmente.

Por kuminsá kumpra for di un mínimo di mitar akshon pa luna (25 Florin). Esaki ta enserá ku abo huntu ku tur sobra miembro por konsiderá nan mes doño di e kooperativa. Akumulando akshon bo ta bini na remarke pa haña dividendo na fin di aña ora tin un surplus. Un miembro por fia maksimal 5 bia e montante akumulá na akshon.

Papiamentu

Notisia

Laga bo e-mail adres pa keda na altura di tur informashon i akontesimientu